सैं री आँखड़ल्यां रो तारो प्यारो राजस्थान

सैं री आँखड़ल्यां रो तारो प्यारो राजस्थान
प्यारो राजस्थान म्हारो प्यारो राजस्थान
सैं री ......................................

गोरा गोरा टीबडियां पर खेत खड़या मुस्कावै
नैणां सुरमो सार गोरड़ी भातो लेकर आवै
गावै अलगोजा री तान म्हारो ..................१ 

राणा सरीखा पूत होवै तो धरती भी सरावै
चेतक जिस्या घोड़ा ढूँढ्या और कठै  ना पावै
होग्या मालिक पर कुरबान म्हारो .............२

लड़बानै जद गयो सायबो मंगवाई सैनाणी
ले कटार सिर काट दे दियो धन्य धन्य छत्राणी
जुग जुग गावै थारो गान म्हारो ................३

गोरा बादल जयमल फत्ता तलवारां खड़काई
भामा जिस्या दानी देखो देखो मीरांबाई
 पन्ना धाई रो बलिदान म्हारो ..................४

वीर पदमणी हाडी राणी गणगौर् यां रो देश
देई देवता निरखण आवै धर जोग्यां रो भेस
चक्कर खावै भगवान म्हारो…….……….५

जैपर बूंदी कोटा देखो देखो बीकानेर
उदैपूर चित्तोड़ देखल्यो देखो अजमेर
आ तो है वीरां री खान म्हारो .................६